Breytum tónlistarhúsinu í spilavíti

Byrjum á að átta okkur á nokkrum einföldum staðreyndum:

1. Klassísk tónlist er uppáhaldstónlist útrásarvíkinganna.

2. Á besta stað í Reykjavík er núna verið að byggja höll, sem á einungis að hýsa klassíska tónlist og fínt fólk. Væri ekki nærri lagi að byggja frekar fangelsi undir þetta fólk?*

3. Ef maður er mjög heppinn, þá er hægt að græða peninga í spilavítum.

*Reyndar líður mér alltaf eins og ég sé í fangelsi þegar ég fer á sinfóníutónleika, en það er önnur saga.

Það átta sig kannski ekki allir á því en Sinfóníuhljómsveit Íslands þarf styrki frá ríkinu til að standa undir sér. Þetta á ekki eftir að breytast, sérstaklega ekki við að flytja hana í stærra og dýrara hús. Í þau fáu skipti sem að hljómsveitin nær að fylla Háskólabíó er þriðjungur salarins andlega fjarverandi (nb. þetta væri Íslandsmet, ef ekki væri fyrir Óháða söfnuðinn). Tónlistarhús, sem á að hýsa tónlist, mun aldrei standa undir sér.

Það væri örugglega hægt að fylla salinn þegar Laddi frumsýnir Laddi-sjötugur og þegar Bubbi heldur 12.12.12. tónleikana sína, en þurfum við í alvörunni flottasta hús í heimi á flottasta stað í heimi fyrir þetta?

Bara ef það væri til einhver starfsemi sem fer fram í flottum húsum á flottum stöðum sem svo gott sem framleiðir peninga...

Ég er augljóslega að tala um að hafa spilavíti á hafnarbakkanum. Það eru enginn rök lengur fyrir því að banna starfsemi spilavíta á Íslandi. Um leið og betsson.com birti fyrstu heilsíðu auglýsinguna sína í Fréttablaðinu hefði mönnum átt að vera þetta ljóst. Betsson er meira að segja á íslensku! Jafnvel Jóhanna gæti notað síðuna, ef hún kynni á internetið.

Hversu lengi ætla Íslendingar að vera þrælar eldgamalla og úldinna hugmynda? Við erum bara 300.000, það ætti ekki að vera svona mikið mál fyrir okkur að keyra í gegn breytingar á samfélaginu.

Um leið og íhaldssemi fer úr tísku á Íslandi gerist eitthvað stórkostlegt.

-Jón Benediktsson